عنصر الذهب : ما هي أنواعه وفيما يستخدم تعرف عليه الان ! - شبكة القمة نيوز

عنصر الذهب : ما هي أنواعه وفيما يستخدم تعرف عليه الان !

بواسطة : آخر تحديث :
عنصر الذهب
جوجل بلس

الذهب من أول العناصر اللي اكتشفها الإنسان على سطح الأرض، ده غير إنه من أكتر العناصر اللي بتستخدم في العصر الحديث
وفي مجالات كتيرة أوي.

وهو عنصر انتقالي يقع في الجدول الدوري الحديث والعدد الذري ليه هو 79 وهو فلز لامع لونه أصفر ذهبي.

رمزه Au ودي اختصار لكلمة Aurum ومعناها باللغة اللاتينية ( الفجر المتوهج ) وترمز إلى اللمعان والتوهج.

كما أن كثافته حوالي 19.3g/cm3، ودرجة انصهاره 1064 ودرجة غليانه 2836،
ودي تعتبر درجة غليان كبيرة جداً مقارنة بدرجة غليان الماء اللي هي 100 درجة مئوية.

تفاعلات الذهب :-

يُعد هذا العنصر مستقر نوعاً ما.

يعني مثلاً مش بيتفاعل مع الأكسجين في الظروف العادية ولا مع الهيدروجين ولا مع الماء ولا حتى في الأوساط القلوية.

ولكن بالنسبة لمركبات وعناصر تانية بيتفاعل معاهم.

زي مثلاً إن قطرات بسيطة جداً من الزئبق قادرة إنها تكسره وتحوله لبلورة فضية محاطة بالزئبق من جميع الجهات.

كما ويتفاعل برضو مع مجموعة الهالوجينات اللي هي زي الكلور والبروم واليود.

خواص الذهب :-

من أهم مميزاته عن باقي العناصر الموجودة في الجدول الدوري إنه ليه قابلية كبيرة جداً للطرق والسحب.

يعني ده معناه إننا ممكن نعمل منه شريحة سمكها 0.00019cm ، وممكن من شوية ذهب قليلين جداً نعمل سلك يوصل لعشرات الكيلومترات بين المدن وبعضها.

وغير إنه مش بيتفاعل مع الهواء ولا الماء يعني مش بيتأكسد ولا بيصدي، ده جعله أشهر عنصر مستخدم في صناعة المجوهرات على مر التاريخ.

أنواع الذهب من حيث العيار :-

كتير بنسمع عن إنه فيه منه عيار 18 وعيار 21 وعيار 24.

والفرق مابينهم يرجع إلى إن النقي اللي بيبقى عبارة عن 100% ذهب أو 99% ده اسمه عيار 24 وعلشان كدة هو أغلى نوع.

كما أنه يتم تصنيع منه العملات المعدنية وبيستخدم في الأجهزة الكهربائية لأنه موصل جيد للكهرباء.

أما الذهب عيار 21 فده بيكون عبارة عن 91.6% ذهب والباقي بيكون عبارة عن خليط من معادن تانية أبرزها النيكل والزنك والفضة، وده بيتم استخدامه بشكل أكبر في المجوهرات.

أما الذهب عيار 18 بيكون 75% منه ذهب والباقي ييكون عبارة عن نحاس وفضة وبيتم استخدامه برضو في صناعة المجوهرات.

استخدامات الذهب :-

مؤخراً تم استعماله في مجال الطب لأنه ليه قدرة عالية جداً في علاج السرطان.

لأن جزيئاته الصغيرة جداً اللي بيكون اسمها Nanoparticles بيتم إضافة مواد كيميائية معينة عليها وبنعمل منها محلول طبي وبنقدر نحقنه في جسم المريض.

والجزئيات الصغيرة دي بتقدر إنها تستشعر أماكن تواجد الخلايا السرطانية وبعدها بتلتصق بيها.

ومن ثمّ تعريض الشخص المريض للإشعاع، وهنا ييجي دور الذهب إنه بيقدر يتحكم في الإشعاع الساقط عليه وبيتم تركيزه على الخلايا المصابة بالسرطان بس.

وبيقدر الإشعاع إنه يقضي على الخلايا دي لوحدها من غير ما يأثر على باقي أعضاء الجسم.

وبيستخدم أيضاً في صناعة المركبات الفضائية وفي تصنيع خوذ رواد الفضاء لأنه بيقدر يمنع تسريب الأشعة الضارة لداخل الجسم.

انتشار الذهب في القشرة الأرضية :-

يحتل المرتبة 75 من حيث انتشاره في القشرة الأرضية.

والصين بتحتل المركز الأول عالمياً في إنتاجه بنسبة 14.6% من الإنتاج العالمي السنوي.

وبعدها بتيجي دولة أستراليا في المركز الثاني بنسبة 8.7% من الإنتاج العالمي السنوي.

وأخيراً بتيجي دولة روسيا في المركز الثالث بنسبة 8.1% من الإنتاج العالمي السنوي.

ودي كانت حكاية الذهب ..

واللي في حالة عدم وجوده كانت حياتنا هتبقى أصعب بكتير لأننا بنستغله في كل مجالات حياتنا.

روابط ذات صلة