عنصر الفرانسيوم : العنصر النادر المشع، تعرف عليه الان

أنت عمرك تخيلت إن فيه مادة موجودة في العالم الجرام الواحد منها بس تمنه مليار دولار !!

لو بصينا على الجدول الدوري الحديث ، هنلاقي عنصر اسمه الفرانسيوم عدده الذري 87 وده موجود في الخانة الأخيرة في المجموعة الأولى ( 1A ).

والمجموعة دي تعتبر من الفلزات القلوية واللي دايماً التفاعلات بتاعتها مع الماء والهواء بتبقى قوية وشديدة جداً.

عنصر الفرانسيوم رمزه Fr هو أغلى عنصر في العالم وأكثرهم ندرة على كوكب الأرض.

لدرجة إن الكمية المتوفرة منه على الأرض حالياً هي من 20 إلى 30 جرام فقط.

ده غير إن ليه صفات تانية زي إنه مشع ومش مستقر نهائي.

درجة انصهاره حوالي 27c⁰ ودرجة غليانه 677c⁰.

تم اكتشافه لأول مرة عام 1939 بواسطة العالمة الفرنسية ( Marguerite perey – مارغريت بري ).

وتم اعتماده بالاسم ده تكريماً لبلدها فرنسا في عام 1949 بواسطة الإتحاد الدولي للكيمياء البحتة والتطبيقية.

عنصر الفرانسيوم ليه نظائر كتير جداً وأشهرهم وأكثرهم استقراراً هو الفرانسيوم 223.

فترة عمر النصف للفرانسيوم :-

فترة عمر النصف للعنصر هي 22 دقيقة ، وفترة عمر النصف هي المدة الزمنية اللي بتحتاجها نصف كمية العنصر علشان تتحلل تحلل تام.

يعني لو معانا 10 جرام من الفرانسيوم بعد 22 دقيقة هيبقوا 5 جرام بس ، وهكذا بعد 22 دقيقة تانية هيبقوا 2.5 جرام.

خواص الفرانسيوم :-

لحد فترة قريبة أوي العلماء مكانش عندهم أي كمية ممكن يحصلوا عليها من الفرانسيوم علشان يقدروا يدرسوا خواصه.

لحد في عام 1991 أكد العلماء إن العنصر ده بيشبه الفلزات اللي موجودة معاه في نفس المجموعة A1 واللي هي زي الصوديوم والبوتاسيوم والسيزيوم.

والتوقعات دي كانت بسبب كمية العنصر القليلة جداً في الطبيعة واللي يعتبر تاني أندر عنصر بعد عنصر الاستاتين Astatine واللي عدده الذري 85.

لأنهم طبعاً مستحيل يعملوا أي تجارب على الجرامات القليلة الموجودة في الطبيعة وإلا

هيختفي بشكل نهائي ومش هيبقى ليه أي وجود.

تصنيع الفرانسيوم معملياً :-

بما إن الفرانسيوم عنصر نادر جداً بشكل طبيعي هل فيه إمكانية لتصنيعه معملياً ؟؟

الإجابة هي نعم في إمكانية لتصنيعه معملياً وده عن طريق إننا ممكن نجيب عنصر ( الثوريوم Thorium ) واللي عدده الذري 90 ونعمله قصف بالبروتونات.

أو نجيب عنصر ( الراديوم Radium ) واللي عدده الذري 88 ونعمله قصف بالنيوترونات وبكدة هيطلعلنا عنصر الفرانسيوم ولكن بكمية قليلة جداً.

لأن أكبر كمية من الفرانسيوم تم تصنيعها على الإطلاق لحد دلوقتي كانت 300.000 ذرة فقط.

ولكن المشكلة الأكبر تكمن في إننا حتى لو قدرنا نصنع منه كمية قليلة فإنها هتختفي تماماً بمجرد تصنيعها وده بسبب فترة عمر النصف القليلة ليه.

وبالتالي هو عنصر صعب تواجده جداً ، مش موجود في الطبيعة ولا حتى عارفين نصنعه معملياً.

تفاعلات الفرانسيوم :-

بما إن مفيش أي تجارب علمية أقيمت على الفرانسيوم لحد دلوقتي فإن العلماء توقعوا تفاعلاته مع باقي العناصر.

بناءاً على تفاعلات باقي عناصر المجموعة A1.

وبالتالي نقدر نقول إنه بيتفاعل مع الماء والهواء تفاعل شديد جداً ، وكمان بيتفاعل بقوة كبيرة جداً مع كل الهالوجينات اللي

هي زي البروم والكلور واليود.

وبرضو هيتفاعل بشدة كبيرة جداً نكاد لا نتوقعها لو تم إضافة حمض الكبريتيك إليه.

ومن ضمن العناصر اللي موجودة في المجموعة A1 معه وهي الصوديوم.

كما وتفاعل الصوديوم مع حمض الكبريتيك بيسبب انفجار شديد جداً ، فلك أن تتخيل إن عنصر زيه اللي لا يقارن نشاطه بنشاط الصوديوم ده غير إنه عنصر مشع كمان هيكون تفاعله شديد إزاي مع حمض الكبريتيك.

استخدامات الفرانسيوم :-

الفرانسيوم ملوش أي استخدامات تجارية نهائي بسبب ندرته وعدم إستقراره ، ولكن احتياجنا للعنصر ده بيكون بأعراض بحثية فقط وليس تجارية.

وكمان ممكن يسببلنا ضرر كبير جداً بسبب سميته واللي من ضمنها إنه ممكن يسبب تلف في خلايا الجسم.

ودي كانت حكاية الفرانسيوم …

اللي مش موجود منه في الطبيعة إلا كميات قليلة جداً وكمان سعره مرتفع ده غير إنه عنصر مشع ومش مستقر نهائي وليه أضرار كبيرة على الإنسان ، يعني نقدر نصنفه إنه من أغرب وأندر العناصر الموجودة على كوكبنا .. كوكب الأرض.

شبكة القمة نيوز