عنصر البوتاسيوم : تفاعلاته ونظائره وارتباطه بجسم الانسان، تعرف عليه الآن - شبكة القمة نيوز

عنصر البوتاسيوم : تفاعلاته ونظائره وارتباطه بجسم الانسان، تعرف عليه الآن

بواسطة : آخر تحديث :
عنصر البوتاسيوم
جوجل بلس

عنصر موجود في حياتنا اليومية ونتعامل معه بشكل كبير.

والعنصر ده حساس جداً للهواء وتفاعله قوي جداً مع الماء.

البوتاسيوم هو عنصر عدده الذري 19 لونه فضي لامع يقع في الجدول الدوري وتحديداً في المجموعة الأولى وهو عنصر ينتمي لمجموعة الفلزات القلوية.

الإسم اللاتيني لهذا العنصر هو kalium علشان كدة بيرمز ليه في الجدول الدوري بحرف ال K.

اكتشفه العالم الانجليزي ( Humphry Davy – همفري ديفي ) عام 1807.

كثافته بتساوي 0.862g/cm3 يعني أقل من كثافة الماء اللي بتساوي 1g/cm3.

وهو معدن صلب في درجة الحرارة العادية ، ودرجة انصهاره هي 63.65⁰c ، في حين إن درجة غليانه 760⁰c.

تفاعلات البوتاسيوم :-

المعروف إن عناصر الفلزات القلوية دايماً بتتفاعل مع الماء تفاعل شديد جداً.

وبالتالي لو جربنا نفاعل قطعة منه في الماء هيحدث تفاعل كبير جداً هينتج عنه انفجار مصاحب لشرارات من اللهب لونها بنفسجي.

تفسير الإنفجار ده هو إننا لما بنيجي نفاعل الماء معه بينتج هيدروكسيد البوتاسيوم مع هيدروجين وحرارة.

والحرارة دي بتبدأ إنها تحفز التفاعل بين الهيدروجين اللي هو موجود في التفاعل وبين الأكسجين الموجود في الجو.

ونتيجة لكدة بيحدث انفجار مصاحب لشرارة من اللهب البنفسجي.

ولكن التفاعل مش بيستمر طول الوقت ولكن بمجرد ما كمية الأكسجين الموجودة في المكان تنفذ أو كميته الموجودة في التفاعل تتفاعل كلها بينتهي التفاعل بشكل نهائي.

كما أنه بيتفاعل تفاعل شديد جداً مع الهواء وعلشان كدة بيتم حفظه في بعض الزيوت مثل زيت البرافين أو بيتم حفظه في غاز خامل زي الأرجون علشان مش بيتفاعل معاه.

وبيتفاعل مع مركبات وعناصر تانية زي حمض الهيدروكلوريك المركز وزي الكلور.

تواجد البوتاسيوم في الطبيعة :-

برغم إن هذا العنصر بيشكل 2.6% من كتلة القشرة الأرضية إلا إن وجوده في صورته الخام أو النقية بيكون نادر جداً.

وبالتالي علشان نحصل عليه نقي بيتم استخلاصه من مركبات تانية زي

( Sylvite, Carnallite, Polyhalite, langbeinite ).

طرق عزل البوتاسيوم النقي من مركباته :-

يتم عزله النقي من المركبات دي بطرق مختلفة منها مثلاً التحليل الكهربي.

أو بيتم تعريض المركبات دي للحرارة العالية علشان تبدأ الروابط الكيميائية إنها تتفكك وتتكسر ونقدر نعزل كل عنصر لوحده وبالتالي نقدر نحصل على البوتاسيوم منفرد.

نظائر البوتاسيوم :-

نظائره كثيرة اشهرها 3 نظائر طبيعية وهي ( بوتاسيوم 39 ) و ( بوتاسيوم 40 ) و ( بوتاسيوم 41 ).

والبوتاسيوم 40 هو النظير المشع للبوتاسيوم ورغم كدة ليه أهمية كبيرة جداً عند العلماء.

لأنه متوزع بشكل كبير في الطبيعة وفي الحيوانات وفي النبات وفي الصخور وحتى في جسم الانسان.

يعني تقريباً كل حاجة على كوكب الأرض فيها كمية ولو صغيرة من الـ 40.

وجسم الإنسان بيحتوي على %0.012 منه المشع أو الـ 40.

بس هي كمية غير كافية إنها تسبب أي ضرر ولكن هي مسئولة بشكل أو بآخر عن النشاط الإشعاعي اللي بيحصل في جسم الانسان.

وطبعاً بما إننا بشر فإحنا بنحتاج له بشكل يومي كعنصر غذائي علشان نقدر نعيش.

واحتياجنا اليومي له هو 4700mg ، ودي الكمية الصحية اللي كل الأطباء بينصحوا بيها علشان نتجنب الإصابة بأي امراض.

مستوى الكالسيوم في جسم الانسان :-

مستوى الكالسيوم الطبيعي في جسم الانسان هو ( 3.5:5 mmol/l مليمول لكل لتر ).

ولو كمية البوتاسيوم نقصت عن المعدل ده بنسبة قليلة جداً بيتصاب الإنسان بمرض ال ( Hypokalemia أو حالة نقص نسبته في الدم ).

وده مرض من أعراضه تعب وضيق وآلام في العضلات وإمساك شديد.

أما لو نسبته نقصت بشكل كبير جداً هيتصاب الإنسان بضعف عضلي شديد وممكن يحصل توقف في التنفس وده بيصاحبه إنسداد في الأمعاء وآلام شديدة جداً.

ولكن لو نسبته زادت عن المعدل الطبيعي بيتصاب الإنسان بمرض ( Hyperkalemia أو حالة زيادة النسبة في الدم ).

ومرضى الكلى هم أكثر الناس تعرضاً للإصابة بالمرض ده ، ومن أعراضه زيادة معدل ضربات القلب وضيق في التنفس وألم في الصدر.

أهم العناصر الغذائية اللي بتحتوي على البوتاسيوم :-

وعلشان نحافظ على نفسنا ونتجنب الإصابة بأي مرض من الأمراض دي لازم يكون غذائك اليومي بيحتوي على كمية مش قليلة ولا كتيرة منه.

ومن أبرز الأطعمة اللي بيكون فيها البوتاسيوم هي الموز أو الفاصوليا أو البطاطس أو البنجر أو عصير البرتقال.

ودي كانت حكاية البوتاسيوم.. 

واللي بنعتمد عليه إعتماد كلي في غذائنا علشان نقدر نكمل حياتنا وإحنا صحتنا كويسة.

شبكة القمة نيوز

روابط ذات صلة